Կոլոմոնսկոյե, գյուղ (1960 թվականից՝ Մոսկվա քաղաքի տարածքում), նախկինում՝ ցարական դաստակերտ, 16— 17 դդ. ճարտարապետական անսամբլ։ Հիշատակվում է 1339 թվականից։ Կոլոմոնսկոյեում է ռուսական ճարտարապետության լավագույն նմուշներից մեկը՝ Համբարձման եկեղեցին (1532 թ․, աղյուսաշեն, սպիտակ քարե մանրամասներով, մոտ 60 մ բարձրությամբ)։ Կենտրոնակազմ, վերձիգ համաչափություններով կառույցն ընդգրկում է ստորին հարակից հաջորդաբար բարձրացող խաչաձև և ութնիստ հատվածքներով ծավալներ ու ավարտվում հարթ գլխիկով պսակված, բարձր, վրանաձև ծածկով։ Կոլոմոնսկոյեի համալիրի կազմում են XVI—XVII դդ. կառույցներ։

1667—1671 թվականներին Կոլոմոնսկոյեում կառուցվել է փայտե պալատ, որը զարդարված է եղել ճոխ փորագրություններով և որմնանկարներով։ Խարխլված կառույցը 1768 թվականին քանդվել է։ 1923 թվականից Կոլոմոնսկոյեն պետական պատմական թանգարանի մասնաճյուղ է (այստեղ են տեղափոխված XVII դ. փայտի ճարտարապետական լավագույն նմուշներ, XVII— XX դդ. դեկորատիվ արվեստի հավաքածու)։

1971 թվականից թանգարան-արգելանոց է (ընդգրկում է նաև Դյակովսկոյե քաղաքատեղին)։