ပတ္တဒါကယ် အား ပတ္တဒါကယ်လူး သို့မဟုတ် ရတ္တပူရ ဟုလည်း ခေါ်ဝေါ်ကြပြီး အိန္ဒိယနိုင်ငံ ကာနာတာကားပြည်နယ်မြောက်ပိုင်းရှိ ၇ ရာစု နှင့် ၈ ရာစုမှ ဟိန္ဒူဘာသာဝင် နှင့် ဂျိမ်းဘာသာဝင်တို့၏ ဘုရားကျောင်းတော် အဆောက်အဦး အစုအဝေး ဖြစ်သည်။ မလာပရာဘာမြစ်၏ အနောက်ဘက်ကမ်း ဘာဂါလာကုတ် ခရိုင်အတွင်း တည်ရှိသော ယူနက်စကို၏ ကမ္ဘာ့အမွေအနှစ်နေရာ သတ်မှတ်ထားခြင်း ခံရသော နေရာသည်။ ဘာဒါမီမြို့မှ ၁၄ မိုင် (၂၃ ကီလိုမီတာ) အကွာနှင့် အိုင်ဟိုးမြို့မှ ၆ မိုင် (၉.၇ ကီလိုမီတာ) အကွာတွင် တည်ရှိကာ ထိုနေရာနှစ်ခုမှာလည်း သမိုင်းတန်ဖိုးအရ အရေးပါသည့် ခြာလုကြာ အထိမ်းအမှတ် အဆောက်အဦးများ တည်ရှိရာ နေရာဖြစ်သည်။ ဤ အထိမ်းအမှတ် အဆောက်အဦး အစုအဝေးသည် အိန္ဒိယ ဥပဒေအရ ထိန်းသိမ်းထားသော နေရာဖြစ်ပြီး အိန္ဒိယ အစိုးရ၏ အိန္ဒိယ ရှေးဟောင်းသုတေသန ကွင်းဆင်းလေ့လာရေး ဌာနမှ စီမံခန့်ခွဲသည်။

ယူနက်စကိုမှ ပတ္တဒါကယ်အား "အိန္ဒိယနိုင်ငံ မြောက်ပိုင်းနှင့်တောင်ပိုင်းမှ ဗိသုကာပုံစံတို့ကို ဟန်ချက်ညီမျှစွာ ပေါင်းစပ်ထားသည်" ဟုဖော်ပြထားပြီး "အမျိုးစုံသော အနုပညာ" တို့ကို ထိပ်ဆုံးရောက်အောင် ပေါင်းစပ်ခြယ်မှုန်းပြထားသည်ဟုလည်း ဆိုသည်။ ဟိန္ဒူဘုရားကျောင်းများသည် ယေဘုယျအားဖြင့် သီဝနတ်ဘုရားအား ရည်စူးတည်ဆောက်ထားသော်လည်း ဗိဿနိုးနတ်အား ကိုးကွယ်မှု နှင့် ရှတ်တီကိုးကွယ်မှု တို့နှင့် ပတ်သက်သည့် ဒဏ္ဍာရီများကိုလည်း ဖော်ပြထားသည်။ ဟိန္ဒူဘုရားကျောင်းများ၏ ထိပ်စည်းပန်းတန်းများ ပေါ်တွင် ဗေဒနှင့် ပျူရဏ သဘောတရားများကို ပြသထားပြီး ရာမယဏ ၊ မဟာဘာရတ နှင့် ဘဂ္ဂဗ္ဗတာ ပျူရဏ ဇာတ်တော်တို့မှ ဇာတ်လမ်းများကို ထွင်းထု ပြသထားသည့် အပြင် အခြား ဟိန္ဒူကျမ်းစာများ ဖြစ်ကြသော ပန်ချာတန္တရ နှင့် ကိရတဂျူနိယ တို့မှ စာတမ်းများကိုလည်း ဖော်ပြထားသည်။ ဂျိမ်းဘုရားကျောင်းသည် ဂျိန တစ်ဦးတည်းကိုသာ ရည်စူးထားသည်။ ခေတ်အဆန်ဆုံး ဘုရားကျောင်းတွင် ရှုပ်ထွေးသော ထိပ်စည်းပန်းတန်းများနှင့် မြောက်ပိုင်းနှင့် တောင်ပိုင်းစတိုင်လ်များ ရောနှောထားပြီး ပါပါနသ ဘုရားကျောင်းနှင့် ဗိရုပက်ရှ ဘုရားကျောင်းတို့တွင် တွေ့ရသည်။ ဗိရုပက်ရှ ဘုရားကျောင်းသည် ဟိန္ဒူတို့ ဘုရားရှိခိုးရာ နေရာ ဖြစ်နေဆဲဖြစ်သည်။