ប្រទេសអាល់ហ្សេរី (ភាសាអារ៉ាប់៖ الجزائر) ដោយមានឈ្មោះជាផ្លូវការថា សាធារណរដ្ឋប្រជាធិបតេយ្យប្រជាមានិតអាល់ហ្សេរី គឺជាប្រទេសមួយស្ថិតនៅក្នុងតំបន់អាហ្វ្រិកខាងជើងនៃទ្វីបអាហ្វ្រិក។ អាល់ហ្សេរីមានព្រំប្រទល់ជាប់នឹងប្រទេសទុយនេស៊ីនៅទិសឥសាន្ត ប្រទេសលីប៊ីនៅទិសខាងកើត ប្រទេសម៉ាលី ម៉ូរីតានី និងសាហារ៉ាខាងលិចនៅទិសនិរតី ប្រទេសនីហ្សេនៅភាគអាគ្នេយ៍ ប្រទេសម៉ារ៉ុកនៅទិសខាងលិច និងសមុទ្រមេឌីទែរ៉ាណេនៅទិសខាងជើង។ អាល់ហ្សេរីជាប្រទេសដែលមានទំហំផ្ទៃដីធំបំផុតនៅក្នុងទ្វីបអាហ្វ្រិកដែលស្មើនឹង ២,៣៨១,៧៤១ គម^២ និងមានប្រជាជនចំនួន ៤៤ លាននាក់ដែលធ្វើឱ្យវាក្លាយជាប្រទេសមានចំនួនប្រជាជនច្រើនបំផុតទីប្រាំបួននៅទ្វីបអាហ្វ្រិក។ រដ្ឋធានី និងទីក្រុងធំបំផុតនៃអាល់ហ្សេរីមានឈ្មោះថា អាល់ហ្សែរ និងមានភាសាអារ៉ាប់ជាភាសាផ្លូវការ។