Ermelinda Allen de Almeida, Baronesa da Regaleira.

A documentación histórica relativa á Quinta da Regaleira é escasa no referido aos tempos anteriores á súa compra por Carvalho Monteiro. Sábese que, en 1697, José Leite era o propietario dunha vasta propiedade nos arredores da vila de Sintra, que hoxe integra a Quinta.

Francisco Albertino Guimarães de Castro comprou a propiedade (coñecida como Quinta da Torre ou do Castro en 1715), en acta pública, e canalizou a auga da serra para alimentar unha fonte alí existente. En 1830, en mans de Manuel Bernardo, a Quinta toma a actual designación. En 1840, a Quinta da Regaleira foi adquirida pola filla dunha negociante do Porto, de apelido Allen, que máis tarde foi agraciada co título de 1ª Baronesa da Regaleira ou a máis coñecida Baronesa de Almeida. Data deste período a construción dunha casa de campo que é visíbel nalgunhas representacións iconográficas de finais do século XIX.

A historia da Regaleira actual comeza en 1892, ano en que a propiedade foi adquirida por António Augusto de Carvalho Monteiro (1848-1920). O arquitecto Henri Lusseau deseñou os primeiros planos entre 1895 e 1896, mais a incapacidade de reinterpretar o estilo manuelino pretendido polo propietario levou á procura doutro intérprete. Carvalho Monteiro acabou por atopar a Luigi Manini, que fixera carreira como escenógrafo no Teatro La Scalla e máis tarde no São Carlos e nos principais teatros portugueses, facéndoo o seu brazo dereito.

A maior parte da construción actual da Quinta tivo inicio en 1904 e rematou en 1910,[1] aínda durante o período da monarquía. Hoxe, a Quinta pertence á Cámara Municipal de Sintra e está aberta ao público.