Mehmed Paxa Sokolovitx zubia (bosnieraz: Most Mehmed-paše Sokolovića; serbieraz: Мост Мехмед-паше Соколовића; turkieraz: Sokullu Mehmet Paşa Köprüsü) Bosnia-Herzegovinako ekialdeko Vixegrad herrian Drina ibaia zeharkatzen duen zubi historikoa da. Mimar Sinan arkitektoak eraiki zuen, XVI. mendearen amaieran, Mehmed Paxa Sokolovitx bisir handiaren aginduz. 11–15 m bitarteko zabalera duten 11 arku dauzka, eta beste lau arku ibaiaren ezkerraldeko sarbide-arrapalan; denetara 179,5 m luze da. Sinanen maisulanetako bat eta otomandar arkitekturaren goren aldiaren lekukoa da. 2007an UNESCOk Gizateriaren ondare izendatu zuen.