Vlkolínec është një fshat nën administrimin e qytetit të Ružomberok në Sllovaki. Historikisht, megjithatë, ishte një fshat më vete. Përmendja e parë me shkrim e fshatit erdhi nga viti 1376 dhe pas 1882 u bë pjesë e Ružomberok. Emri i tij ndoshta rrjedh nga fjala sllovake "vlk", pra ujk.

Vlkolínec është renditur si një sit i Trashëgimisë Botërore të UNESCO-s që nga viti 1993, dhe është një nga dhjetë fshatrat sllovake që i është dhënë statusi i rezervave të arkitekturës popullore. Ky status u dha sepse fshati është një shembull i paprekur dhe kompleks i arkitekturës popullore fshatare të rajonit të Karpateve Veriore.

Vlkolínec, i vendosur në qendër të Sllovakisë, është një vendbanim jashtëzakonisht i paprekur me tiparet tradicionale të një fshati të Evropës Qendrore. Është grupi më i plotë i rajonit i këtyre llojeve të shtëpive tradicionale prej druri, që gjenden shpesh në zonat malore. Fshati përbëhet nga më shumë se 45 shtëpi prej druri secila prej tyre e përbërë nga dy ose tre dhoma. Gjithashtu është ruajtur një kambanore prej druri e shekullit të 18-të, si dhe kapela barok. Shtëpitë nr.16 dhe 17 janë kthyer në një muze popullor me të gjitha instrumentet e jetës dhe punës së përditshme.