ရွာမ သည် ရှမ်းပြည်နယ်၊ တောင်ကြီးခရိုင်၊ ညောင်ရွှေမြို့နယ် အင်းလေးကန်၏ အနောက်ဘက်တွင် တည်ရှိသည့် ကျေးရွာတစ်ခု ဖြစ်သည်။ ၎င်းကို အင်းလေးရွာမ ဟု လူအများ သိကြသည်။ ရွာသူရွာသားများသည် ကန်၏ မြောက်ဘက်တွင် တည်ရှိသည့် ညောင်ရွှေမြို့သို့ လှေကို အများဆုံးအသုံးပြုကာ သွားလာကြသည်။

လူနေအိမ်များနှင့် အဆောက်အဦများ အားလုံးနီးပါးသည် ကန်၏ မြေအောက်ကြမ်းပြင်ကို တိုင်ထူစိုက်ကာ တည်ထားကြသည်။ ထိုဒေသတွင် နေထိုင်ကြသူများသည် လှေငယ်များဖြင့် သွားလာကြသည်။ သို့သော်လည်း ဝါးဖြင့်ပြုလုပ်ထားသည် လျှောက်လမ်းများနှင့် တံတားများသည် လှေသွားရာလမ်းတစ်လျှောက်တွင် အပေါ်မှ ယှက်သန်းတည်ရှိလျက်ရှိသည်။ ထို့အတွက်ကြောင့် အင်းလေးရွာမတွင် အဓိကလမ်း သို့မဟုတ် လမ်းဆုံဟူ၍ မရှိပေ။ ဘုရားကျောင်းကန်များနှင့် ဘုန်းတော်ကြီးကျောင်းများသာ တည်ရှိသည်။

ရွာမသည် အင်းလေး၌ ငါးရက်တစ်ကြိမ်စီကျ လှည့်လည်ဈေးခင်းသည့် နေရာတစ်ခု ဖြစ်သည်။ ထိုဈေးသည် တစ်နေ့လျှင် မတူညီသည့် နေရာများတွင် ဈေးခင်းသည်။ ရွာမဈေးနေရာသည် ဘုရား၏ ရင်ပြင်တော်တွင် ဈေးခင်းကြသည်။ သို့သော်လည်း ရောင်းဝယ်မှုအများစုကို ဈေးသည်များသည် လှေပေါ်တွင် ပြုလုပ်ကာ သူတို့၏ လက်မှုအနုပညာပစ္စည်းများနှင့် ထုတ်ကုန်ပစ္စည်းများကို ဒေသခံများနှင့် ခရီးသွားများကို ရောင်းချကြသည်။ ဤရေပေါ်ဈေးသည် ခရီးသွားများကို ကြီးမားစွာစွဲဆောင်လျက်ရှိသည်။

ရွာတွင် ဘုန်းတော်ကြီးကျောင်းတစ်ခု၊ စေတီတစ်ဆူရှိပြီး ပန်းထိမ်လုပ်ငန်းများ၊ ရက်ကန်းလုပ်ငန်းများနှင့် သစ်သားပန်းပုလုပ်ငန်းများနှင့် ထီးလုပ်ငန်းများ လုပ်ကိုင်ကြသည်။ ထို့အပြင် ရေပေါ်တွင် စိုက်ပျိုးထားသည့် သစ်သီးခြံများလည်း တည်ရှိသည်။ စိုက်ပျိုးသူ တောင်သူများသည် ဝါးတိုင်များကို အမှီပြု စိုက်ထူကာ ကျွန်းမျောများပေါ်တွင် ခရမ်းချဉ်သီးပင်များကို စိုက်ပျိုးကြသည်။

ဝေဟင်မှ ကြည့်လိုက်ပါက သီးနှံများစိုက်ပျိုးထားသည့် စိုက်ခင်းများဖြင့် ပြည့်နှက်နေသဖြင့် ကန်ရေပြင်ဟု ဆိုခြင်းထက် မြေပြင်တစ်ခုသဖွယ် ဖြစ်နေသည်။ ရွာမသည် ငါးဖယ်ကျောင်း (ကြောင်ခုန်ကျောင်း)၏ တောင်ဘက်တွင် တည်ရှိပြီး ရွှေအင်းတိန်ဘုရားတည်ရှိရာ အင်းတိန်ကျေးရွာ၏ အရှေ့မြောက်ဘက်တွင် တည်ရှိသည်။