ကီတိုမြို့သည် အီကွေဒေါနိုင်ငံ၏ မြို့တော် နှင့် အကြီးဆုံးမြို့ ဖြစ်ပြီး ပင်လယ်ရေမျက်နှာပြင် အထက် ၉,၃၅၀ပေ (၂,၈၅၀ မီတာ) အမြင့် တွင် တည်ရှိကာ အီကွေတာနှင့် နီးစပ်စွာတည်ရှိသော ဘိုလီးဗီးယားနိုင်ငံ လာပတ်ဇ်မြို့ ပြီးလျှင် ကမ္ဘာပေါ်တွင် ဒုတိယမြောက် အမြင့်ဆုံးနေရာ၌ တည်ရှိသော မြို့တော် တစ်ခု ဖြစ်သည်။ဂွယ်လာဘမ်ဘာမြစ်ဝှမ်းတွင် တည်ရှိပြီး အင်န်ဒီးစ် တောင်တန်းများရှိ စထရာတိုမီးတောင်ရှင် တစ်ခု ဖြစ်သော ပီချင်ချာ မီးတောင်၏ အရှေ့ဘက် ကုန်းစောင်းတွင် တည်ရှိသည်။တမ်းပလိတ်:Vn

၂၀၁၈ ခုနှစ်တွင် မြို့တော်အား တောင်အမေရိကနိုင်ငံများ သမဂ္ဂ၏ ရုံးချုပ် အဖြစ် သတ်မှတ်ခဲ့သည်။

ကီတိုသမိုင်းဝင်ဌာနသည် အမေရိကားတိုက်ရှိ အကြီးမားဆုံး၊ ပြုပြင်မှု အနည်းဆုံး နှင့် အကောင်းဆုံး ထိန်းသိမ်းထားသော ဌာန တစ်ခု ဖြစ်သည်။ ကီတိုမြို့ နှင့် ခရာကောင်းမြို့ဟောင်း တို့သည် ယူနက်စကိုမှ ၁၉၇၈ ခုနှစ်တွင် ပထမဆုံး ကြေညာခဲ့သော ကမ္ဘာ့အမွေအနှစ်နေရာ များတွင် ပါဝင်ခဲ့သည်။ ကီတိုမြို့၏ ဗဟိုရင်ပြင်သည် အီကွေတာ၏ တောင်ဘက် ၁၆မိုင် (၂၅ ကီလိုမီတာ) အကွာတွင် တည်ရှိသည်။ မြို့တော်သည် လတ္တီကျု သုညဒီဂရီမှ ၀.၆၂မိုင် (၁ ကီလိုမီတာ) အတွင်း ဖြန့်ကျက် တည်ရှိသည်။ အီကွေတာပေါ်တွင် ရှိသော အထိမ်းအမှတ်အဆောက်အဦး နှင့် ပြတိုက်အား လာမီတက်ဒယ်လ်မွန်ဒို (ကမ္ဘာ၏ အလယ်ခေါင်) ဟု ဒေသတွင်း ခေါ်ဝေါ်ကြပြီး အီကွေဒေါ ဟူသော အမည်မှာ စပိန်ဘာသာဖြင့် အီကွေတာဟု အမည်ရသဖြင့် ရှုပ်ထွေးမှု မဖြစ်အောင် ခွဲခြားထားခြင်း ဖြစ်သည်။