ဂျိုင်းယင့်၏ ရေကျော်လမ်း သည် ရှေးခေတ် မီးတောင် ပန်းထွက် ပေါက်ကွဲမှုကြောင့် ဖြစ်ပေါ်လာသော မီးတောင်ချော်နက်တိုင် ၄၀,၀၀၀ ခန့် တွဲဆက် နေသည့် နေရာဖြစ်သည်။ ၎င်းသည် အိုင်ယာလန်နိုင်ငံမြောက်ပိုင်း ကမ်းရိုးတန်းရှိ အန့်ရင်းမ်ကောင်တီတွင် တည်ရှိပြီး ဘွတ်ရှ်မေးလ်မြို့၏ အရှေ့မြောက်ဘက် ၃မိုင်( ၅ကီလိုမီတာ) ခန့် အကွာတွင် တည်ရှိသည်။

၁၉၈၆ ခုနှစ်တွင် ယူနက်စကိုမှ ကမ္ဘာ့အမွေအနှစ်နေရာ အဖြစ် ကြေညာခဲ့ပြီး မြောက်အိုင်ယာလန် သဘာဝပတ်ဝန်းကျင်ဌာနမှ ၁၉၈၇ ခုနှစ်တွင် အမျိုးသားသဘာဝထိန်းသိမ်းစောက်ရှောက်ရေး ဒေသ အဖြစ် ကြေညာခဲ့သည်။ ၂၀၀၅ ခုနှစ် ရေဒီယိုတိုင်းမ် ဖတ်ရှူသူများအား မဲပေးခိုင်းရာတွင် ဂျိုင်းယင့်၏ ရေကျော်လမ်းအား ယူနိုက်တက်ကင်းဒမ်းနိုင်ငံ၏ စတုတ္ထမြောက် အကြီးကျယ်ဆုံး သဘာဝ အံ့ဖွယ်အဖြစ် မဲပေးရွေးချယ်ခဲ့ကြသည်။ တိုင်များ၏ ထိပ်သည် ခြေနင်းစရာ ကျောက်တုံးများအဖြစ်ရှိပြီး တောင်စွန်း၏အခြေမှ စတင်ကာ ပင်လယ်ရေအောက်သို့ ငုပ်လျှိုးပျောက်ကွယ်သွားသည်။ တိုင်အများစုမှ ဆဌဂံပုံ ဖြစ်ကြသော်လည်း အချို့မှာ ထောင့်အရေအတွက် ၄၊၅၊ ၇ နှင့် ၈ ခုတို့ ဖြစ်ကြသည်။ အမြင့်ဆုံးတိုင်မှာ ၁၂ မီတာ (၃၉ပေ) မျှ မြင့်ပြီး တောင်စွန်းရှိ ခဲနေသောချော်ရည်များမှာ ၂၈ မီတာ (၉၂ ပေ) အထိ အထူ ရှိကြသည်။

ဂျိုင်းယင့်၏ ရေကျော်လမ်းနှင့် ရေကျော်လမ်း ကမ်းရိုးတန်း ကမ္ဘာ့အမွေအနှစ်နေရာ၏ နေရာအများစုအား အမျိုးသားထိန်းသိမ်းစောင့်ရှောက်ရေး အဖွဲ့မှ ပိုင်ဆိုင်ပြီး စီမံခန့်ခွဲသည်။ ၎င်းသည် မြောက်အိုင်ယာလန်တွင် ရေပန်းအစားဆုံး ကမ္ဘာလှည့်ခရီးသွားများ လာရောက်လည်ပတ်ရာ နေရာတစ်ခု ဖြစ်ပြီး ၂၀၁၉ တွင် လာရောက်လည်ပတ်သူ ၉၉၈,၀၀၀ ဦး မျှ ရှိသည်။ ဂျိုင်းယင့်၏ ရေကျော်လမ်းသို့ လည်ပတ်ရာတွင် အခမဲ့ဖြစ်ပြီး အခကြေးငွေကောက်ခံသော ဧည့်သည်ဌာနသို့ သွားရောက်ရန် မလိုအပ်ပေ။ ကျန်ရှိသော နေရာများမှာ နန်းတော်ပိုင် နေရာများ နှင့် ပုဂ္ဂလိကပိုင်ရှင်အချို့ ပိုင်ဆိုင်သော နေရာများ ဖြစ်သည်။