ប្រទេសតាជីគីស្ថាន (ភាសាតាហ្ស៊ីក៖ Тоҷикистон; ភាសារុស្ស៊ី៖ Таджикистан), ដោយមានឈ្មោះជាផ្លូវការថា សាធារណរដ្ឋតាជីគីស្ថាន (ភាសាតាហ្ស៊ីកក៖ Ҷумҳурии Тоҷикистон) គឺជាប្រទេសមួយស្ថិតនៅតំបន់អាស៊ីកណ្តាល។ ប្រទេសនេះមានក្រឡាផ្ទៃសរុប ១៤៣,១០០ គីឡូម៉ែត្រការ៉េ និងមានប្រជាជនចំនួន ៩,៥៣៧,៦៤៥ នាក់។ វាមានរដ្ឋធានីឈ្មោះ ឌូសង់បេ ហើយក៏ត្រូវជាទីក្រុងធំបំផុតនៅក្នុងប្រទេសផងដែរ។ តាហ្ស៊ីគីស្ថានមានព្រំប្រទល់ជាប់នឹងប្រទេសអាហ្វហ្កានីស្ថាននៅភាគខាងត្បូង ទិសខាងលិចជាប់នឹងអ៊ូសបេគីស្ថាន ខាងជើងជាប់នឹងកៀគីស្ថាន និងនៅទិសខាងកើតជាប់នឹងប្រទេសចិន។ ទឹកដីដើមឬទឹកដីប្រពៃណីរបស់ជនជាតិតាហ្ស៊ីកបានគ្របដណ្តប់លើប្រទេសតាហ្ស៊ីគីស្ថានសព្វថ្ងៃ រួមជាមួយផ្នែកខ្លះនៃប្រទេសអាហ្វហ្កានីស្ថាននិងអ៊ូសបេគីស្ថានផង។