რანგანათას ტაძარი — ერთ-ერთი უდიდესი ინდუისტური ტაძრის კომპლექსი. იგი აგებულია დრავიდული არქიტექტურული სტილით და ეძღვნება რანგანათა ვიშნუს ღვთაებას. მდებარეობს მდინარე კავერის კუნძულ შრირანგამზე, ტამილ ნადუს შტატში (ინდოეთი). იმავე კუნძულზე მდებარეობს კიდევ ერთი დიდი ჯამბუკეშვარის ტაძრის კომპლექსი, რომელიც აშენდა ჩვენს წელთაღრიცხვამდე II საუკუნეში  შივას პატივსაცემად. III-VII საუკუნეების ტამილური ლიტერატურა მიუთითებს იმაზე, რომ შრირანგამი იყო ვიშნუიზმისა და შივაიზმის მიმდევართა რელიგიური ცენტრი. ამასთან, XI საუკუნის ბოლოს - XII საუკუნის დასაწყისში რამანუჯას რეფორმაციის შემდეგ, რეგიონში ვაიშნავიზმმა (ვიშნუიზმი) დაიწყო გაბატონება.

რანგანათას ტაძარს განსაკუთრებით თაყვანს სცემენ შრი ვაიშნავიზმის ტრადიციის მიმდევრები . მათ მიაჩნიათ, რომ იგი დედამიწაზე პირველი და უმთავრესი ტაძარია 108 მთავარ სალოცავს შორის.

2014 წლიდან ტაძარი იუნესკოს მსოფლიო კულტურული  მემკვიდრეობის ძეგლების კანდიდატთა სიაშია .