კოტორი (სერბული კირილიცა: Котор; იტალ. Cattaro) — ზღვისპირა ქალაქი მონტენეგროში. მდებარეობს კოტორის ყურესთან. მოსახლეობა შეადგენს 13 510 ადამიანს, წარმოადგენს კოტორის მუნიციპალიტეტის ადმინისტრაციულ ცენტრს. უკანასკნელ წლებში ქალაქისადმი ტურისტთა ინტერესი მკვეთრად გაიზარდა. ბევრი მათგანი კოტორს საკრუიზო გემით სტუმრობს. მათ იზიდავთ როგორც კოტორის ყურის ბუნებრივი სილამაზე, ისე ძველი ქალაქი.

კოტორი არის იუნესკოს მსოფლიო მემკვიდრეობის ძეგლის – კოტორის ისტორიულ-კულტურული და ბუნებრივი რეგიონის ნაწილი.