კასაბლანკა (ესპ. casa — „სახლი“, blanca — „თეთრი“, „თეთრი სახლი“; მოროკ. არაბ. الدار البيضا‎ — ელ-დარ-ელ-ბაიდა) — მაროკოს უდიდესი ქალაქი და ნავსადგური ატლანტის ოკეანის სანაპიროზე, საქალაქო პრეფექტურა. ის ასევე ერთ-ერთი უმნიშვნელოვანესი ქალაქია აფრიკაში როგორც ეკონომიკურად ასევე დემოგრაფიულად.

კასაბლანკა არის მაროკოს მთავარი პორტი და ინდუსტრიული ცენტრი. ის ასევე მაღრიბის უდიდესი ქალაქია. კასაბლანკას პორტი მსოფლიოს ერთ-ერთი უმსხვილესი და ჩრდილოეთ აფრიკის უდიდესი პორტია. კასაბლანკაშია ბაზირებული მაროკოს სამეფო საზღვაო ძალები.