Գոբին (մոնղ.՝ Говь ջրազուրկ վայր; չինարեն՝ 戈壁), ընդարձակ շրջան է Կենտրոնական Ասիայում (Մոնղոլիայի և Չինաստանի տարածքում), որտեղ գերակշռող մասը կազմում են անապատները և կիսաանապատային լանդշաֆտները։

Անապատի լայնացման կանխման նպատակներով Չինաստանը ռեալիզացնում է «Կանաչ չինական պատ» նախագիծը։ Կլիման խիստ ցամաքային է, ջերմաստիճանների տարեկան տատանումները հասնում են 85 °C (հունվարինը՝ — 40 °C, հուլիսինը՝ 45 °C), տեղումները՝ 68—200 մմ։ Գերակշռում են մոխրագորշ և գորշ հողերը։ Բուսականությունը աղքատ է, բնորոշ են գոբիական սեզը, օշանը, դեղին ակացիան, սաքսաուլը, կարմրանը, ելաբույսը, զուգատերևազգիները, բազմամյա և միամյա խոտաբույսերը։ Լեռներում և օազիսներում աճում են խեժափիճի, կեչի, բարդի, ուռենի։ Կենդանական աշխարհը բազմատեսակ է դեռևս պահպանվել են վայրի ուղտը, կուլանը, Պրժևալսկու ձիերի մի քանի տեսակներ։