O Templo Sri Mariamman (en tamil: ஸ்ரீ மாரியம்மன் கோவில்) é o templo hindú máis antigo de Singapur. É un templo agámico, construído ao estilo dravídico. Situado en 244 South Bridge Road, no distrito céntrico de Chinatown, o templo serve á maioría dos hindús singapurenses, tamilianos, na cidade-estado. Debido á súa importancia arquitectónica e histórica, o templo foi declarado Monumento Nacional e é unha importante atracción turística. O templo de Sri Mariamman está xestionado pola Hindu Endowments Board, unha xunta estatutaria dependente do Ministerio de Desenvolvemento Comunitario, Xuventude e Deportes.

O templo de Sri Mariamman foi fundado en 1827 por Naraina Pillai, oito anos despois de que a Compañía das Indias Orientais establecese un asentamento comercial en Singapur. Pillai era un funcionario do goberno de Penang que chegou a Singapur con Sir Stamford Raffles na súa segunda visita á illa en maio de 1819. Pillai pasou a crear a primeira empresa de construción da illa e tamén entrou no comercio téxtil. Rápidamente estableceuse nos negocios e foi identificado como un líder da comunidade india.