Tsodilo Kalahari basamortuan dauden lau muinok osaturiko lekua da, Botswanako ipar-ekialdean, Okavangoko deltatik gertu. 2001ean, bertan dagoen labar-artea zela eta, Unescok Gizateriaren Ondare izendatu zuen. Altuenak "Arra" du izena; margolan gehien dituenak, "Emea"; beste bati, "Umetxo" esaten zaio; eta azkenak ez du izenik. Bertoko San herriak leku sakratutzat dituzte eta "Jainkoen mendiak" eta "Xuxurlatzen duten arrokak" esaten diete.
Guztira 4.500 labar-pintura inguru ditu eta ospetsuenak "Balea", "Bi errinozeroak" eta "Lehoia" izenekoak dira. Badaude 24.000 urte dituzten pinturak. 2006an, Sheila Coulson arkeologo kanadarrak bertoko kobazulo batean pitoi erraldoi baten itxura duen arroka bat topatu zuen. Burutik gertu lan egin ondoren 70.000 urteko gezi-puntak topatu zituen, munduan inoiz izandako erritualik zaharrenaren aztarnak direnak.
Gehitu iruzkin berria