ဆာရာယေဗိုမြို့ (အင်္ဂလိပ်: Sarajevo၊ ၊ SARR-ə-YAY-voh၊ Bosnian pronunciation: [sǎrajeʋo] ( ))သည် ဘော့စနီးယားနှင့် ဟာဇီဂိုဗီးနားနိုင်ငံ (Bosnia and Herzegovina) ၏ အကြီးဆုံးမြို့လည်းဖြစ်၊ မြို့တော်လည်းဖြစ်သည်။ ၎င်း၏ အုပ်ချုပ်ရေးနယ်နမိတ်အတွင်း၌ ၂၀၁၃ သန်း​ခေါင်စာရင်းအရ လူဦးရေ ၂၇၅,၅၂၄ နေထိုင်သည်။ ဆာရာယေဗိုခရိုင်(Canton)၊ အရှေ့ ဆာရာယေဗို နှင့် အနီးအနားရှိ မြူနီစီပယ်အုပ်ချုပ်ရေးဒေသများအပါအဝင် ဆာရာယေဗိုမြို့ပြဧရိယာ (metropolitan area)အတွင်း နေထိုင်သူ ၅၅၅,၂၁၀ နေထိုင်သည်။ ဒစ်နယ်ရစ်က် အယ်လ်ပ် ( Dinaric Alps) တောင်တန်းများ ဝန်းရံထားသော မစ်လယက်စကာ (Miljacka) မြစ်ကြောင်းတစ်လျှောက်ရှိ ဆာရာယေဗိုတောင်ကြားဒေသအတွင်း တည်ရှိပြီး ဘော်လကန်ဒေသ၏ အလယ်ပိုင်းတွင် တည်ရှိသည်။

ဆာရာယေဗိုသည် ဘော့စနီးယားနှင့် ဟာဇီဂိုဗီးနားဒေသ၏ နိုင်ငံရေး၊ ဘဏ္ဍာရေး၊ လူမှုရေးနှင့် ယဉ်ကျေးမှု ဗဟိုချက်ဖြစ်ပြီး၊ ဘော်လကန်ဒေသ၏ ထင်ရှားသော ယဉ်ကျေးမှုဗဟိုတစ်ခု ဖြစ်သည်။ ဖျော်ဖြေရေး၊ ရုပ်သံစာနယ်ဇင်း၊ ဖက်ရှင်နှင့် အနုပညာဧရိယာများတွင် ဒေသတစ်ခုလုံးအပေါ် ဩဇာသက်ရောက်မှုရှိသောနေရာ ဖြစ်သည်။

ဘာသာရေးနှင့် ယဉ်ကျေးမှု အရောင်အသွေးစုံထူးခြားမှု (diversity) တို့တွင် ရှည်လျားသော သမိုင်းကြောင်းကြောင့် ဆာရာယေဗိုအား တစ်ခါတစ်ရံ "ဥရောပ၏ ဂျေရုဆလင်" သို့မဟုတ် "ဘော်လကန်ဒေသ၏ ဂျေရုဆလင်" ဟုခေါ်ကြသည်။ ၎င်းသည် ရပ်ကွက်တစ်ခုတည်းတွင် ဗလီ၊ ကက်သလစ် ဘုရားကျောင်း၊ ရှေးရိုး ခရစ်ယာန် ဘုရားကျောင်း (Orthodox church) နှင့် ရဟူဒီဘုရားကျောင်း (synagogue) အားလုံးတို့ကိုတွေ့နိုင်သော ဥရောပ အဓိကမြို့ကြီးအချို့မှ တစ်ခုဖြစ်သည်။ ဒေသ၏ပညာရေးဆိုင်ရာ ဗဟိုအချက်အချာမြို့လည်း ဖြစ်သည်။ ယနေ့ ဆာရာယေဗိုတက္ကသိုလ် (University of Sarajevo) ၏ တစ်စိတ်တစ်ပိုင်းဖြစ်သော ဘော်လကန်ဒေသ၏ ပထမဆုံး အစ္စလာမ် အဆင့်မြင့်ပညာရေးတက္ကသိုလ်ကျောင်း တည်ရှိသောမြို့လည်း ဖြစ်သည်။