Μυκηναϊκός πολιτισμός ( မိုက်ဆီးနီးယန် ဂရိ )

မိုက်ဆီးနီးယန် ဂရိ (အင်္ဂလိပ်: Mycenaean Greece or Mycenaean civilization) သည် ရှေးခေတ်ဂရိနိုင်ငံ ကြေးခေတ်ကာလ၏ နောက်ဆုံးကာလတစ်ခုဖြစ်၍ ဘီစီ ၁၆၀၀-၁၁၀၀ ဝန်းကျင်ခန့်အထိ သက်တမ်းရှိခဲ့သည်။ ကျယ်ဝန်းသော ပြည်နယ်ဒေသများ၊ မြို့ပြ လူမှုအဖွဲ့အစည်းများ၊ အနုပညာလက်ရာများနှင့် စာရေးနည်းစနစ် စသည်တို့နှင့်အတူ ဂရိပြည်မကြီးတွင် ပထမဆုံးသော ခေတ်မီ၍ သိသာကွဲပြားသည့် ယဉ်ကျေးမှုတစ်ရပ်ကိုလည်း ကိုယ်စားပြုဖော်ပြနိုင်သည်။ အထင်ရှားဆုံးနေရာမှာ မိုက်ဆီးနီး ရှေးဟောင်းမြို့တော်ဖြစ်ပြီး အာဂိုးလစ်ကျွန်းဆွယ်တွင် တည်ရှိသည်။ အခြားထင်ရှားသောနေရာများမှာ ပိုင်းလော့စ်မြို့၊ တစ်ရင်စ်မြို့၊ ပလာပနီးဇ်ရှိ မီဒဲယာမြို့၊ အော်ခါမန်းနော့ရှ်မြို့နှင့် သီးဗာမြို့၊ ဂရိအလယ်ပိုင်းရှိ အေသင်မြို့၊ သက်စာလီအရပ်ရှိ အိုင်ယောကပ်စ်မြို့ တို့ဖြစ်ကြသည်။ မိုက်ဆီးနီးယန်နှင့် ၎င်း၏ဩဇာသက်ရောက်သော အခြေချနေထိုင်မှုများသည် အစ်ပီးရပ်စ်ဒေသ (ဂရိအနောက်မြောက်) ဒေသ၊ မက်ဆီဒိုးနီးယားဒေသကြီး အီးဂျီယန်ပင်လယ်မှ ကျွန်းများ၊ အနာတိုလီယား ကမ်းရိုးတန်း၊ လာဗန့်ဒေသ၊ ဆိုက်ပရပ်စ်နိုင်ငံ နှင့် အီတလီ တို့တွင် ဖြစ်ကြသည်။