ប្រទេសអេស្តូនី (ភាសាអេស្តូនី៖ Eesti) ដោយមានឈ្មោះជាផ្លូវការថា សាធារណរដ្ឋអេស្តូនី (ភាសាអេស្តូនី៖ Eesti Vabariik) គឺជាប្រទេសមួយស្ថិតនៅតំបន់អឺរុ៉បខាងជើង។ ប្រទេសនេះមានព្រំប្រទល់ខាងជើងជាប់ឈូងសមុទ្រហ្វាំងឡង់ ទិសខាងលិចជាប់សមុទ្របាល់ទិក ខាងត្បូងជាប់នឹងប្រទេសឡេតូនី និងខាងកើតជាប់បឹងប៉ីពូស និងប្រទេសរុស្ស៊ី។ ទឹកដីនៃប្រទេសអេស្តូនីរួមមានដីគោក កោះធំៗពីរហៅ សារ៉េម៉ា និង ហ៊ីយូម៉ា និងថែមទាំងកោះតូចៗជាង ២,២០០ ទៀតនៅឯឆ្នេរសមុទ្រភាគខាងកើតនៃសមុទ្របាល់ទិក។ ប្រទេសអេស្តូនីបានគ្របដណ្តប់លើផ្ទៃដីសរុប ៤៥,៣៣៩ គីឡូម៉ែត្រការ៉េ។ រដ្ឋធានីតាលីន និងតារទូ គឺជាតំបន់ទីក្រុងធំបំផុតនៅក្នុងប្រទេស។  ភាសាអេស្តូនីគឺជាភាសាផ្លូវការនៃប្រទេស និងក៏ជាភាសាទីមួយនៃប្រជាជនភាគច្រើនផងដែរ។