ប្រទេសកូរ៉េខាងជើង ដោយមានឈ្មោះជាផ្លូវការថា សាធារណរដ្ឋប្រជាមានិតប្រជាធិបតេយ្យកូរ៉េ គឺជាប្រទេសមួយស្ថិតនៅភូមិភាគអាស៊ីបូព៌ា។ ប្រទេសនេះមានព្រំដែនជាប់ប្រទេសចិន និងរុស្ស៊ីនៅភាគខាងជើង និងប៉ែកខាងត្បូងជាប់នឹងប្រទេសកូរ៉េខាងត្បូងត្រង់តំបន់គ្មានយោធាកូរ៉េ។ នៅភាគខាងលិចនៃប្រទេសកូរ៉េខាងជើងមានព្រំប្រទល់ជាប់នឹងឆកសមុទ្រកូរ៉េ និងសមុទ្រលឿង រីឯខាងកើតជាប់នឹងសមុទ្រជប៉ុន។ ដូចសមភាគីខាងត្បូងរបស់ខ្លួនដែរ កូរ៉េខាងជើងគឺតែងតែអះអាងថាខ្លួនគឺជារដ្ឋាភិបាលស្របច្បាប់នៃឧបទ្វីបកូរ៉េទាំងមូលនិងរួមទាំងបណ្តុំកោះតូចៗនៅជុំវិញផង។ ព្យុងយ៉ាងគឺជារដ្ឋធានីនិងទីក្រុងធំបំផុតនៃប្រទេសកូរ៉េខាងជើង។

នៅឆ្នាំ១៩១០ ទឹកដីកូរ៉េត្រូវបានបញ្ចូលទៅជាផ្នែកនៃចក្រភពជប៉ុនហើយបន្ទាប់ពីជប៉ុនបានចាញ់សង្គ្រាមលោកលើកទី២ នៅក្នុងឆ្នាំ១៩៤៥ ប្រជាជាតិកូរ៉េក៏ត្រូវបានបែងចែកជាពីរតំបន់ដាច់ពីគ្នានៅត្រង់ខ្សែស្របទី៣៨ ដោយភាគខាងជើងត្រូវស្ថិតនៅក្រោមការកាន់កាប់របស់សហភាពសូវៀត និងភាគខាងត្បូងត្រូវស្ថិតនៅក្រោមសហរដ្ឋអាមេរិក។ កិច្ចចរចាដើម្បីបង្រួបបង្រួមជាតិត្រូវទទួលបរាជ័យហើយទីបំផុតនៅឆ្នាំ១៩៤៧ រដ្ឋាភិបាលថ្មីៗក៏បានបង្កើតឡើងដោយខាងជើងត្រូវស្ថិតនៅក្រោមរដ្ឋាភិបាលសង្គមនិយមរីឯខាងត្បូងត្រូវស្ថិតនៅក្រោមរបបមូលធននិយម។ មុនបង្កើតចេញជារដ្ឋមួយផ្លូវការ កូរ៉េខាងជើងត្រូវឆ្លងកាត់រដ្ឋាភិបាលបណ្តោះអាសន្នចំនួនបួនគឺ៖ សាធារណរដ្ឋប្រជាមានិតកូរ៉េ រដ្ឋបាលស៊ីវិលសូវៀត គណៈកម្មាធិការប្រជាជនបណ្តោះអាសន្ននៃកូរ៉េខាងជើង និងគណៈកម្មាធិការប្រជាជនកូរ៉េខាងជើង។ សង្គ្រាមកូរ៉េបានផ្ទុះឡើងនៅក្នុងឆ្នាំ១៩៥០ ដោយមានកូរ៉េខាងជើងជាអ្នកផ្តើមការឈ្លានពានដំបូងហើយសង្គ្រាមមួយនេះបានអូសបន្លាយរហូតដល់ឆ្នាំ១៩៥៣។ យុទ្ធសន្តិភាពកូរ៉េត្រូវបានចុះនៅក្រោយសង្គ្រាមហើយតំបន់គ្មានយោធាក៏បានបង្កើតឡើងប៉ុន្តែគ្មានសន្ធិសញ្ញាសន្តិភាពជាផ្លូវការណាត្រូវបានចុះដោយប្រទេសទាំងពីរឡើយ។