სოლთანიე ( სპარს. سلطانيه) — ქალაქი ირანში, ზენჯანის ოსტანში, თეირანიდან 240 კმ-ით ჩრდილო-დასავლეთით. XIV საუკუნეში, ის სპარსეთის ილხანი მმართველების დედაქალაქი იყო. მისი სახელი ითარგმნება როგორც „იმპერიული“ 2005 წელს, ქალაქი იუნესკომ მსოფლიო მემკვიდრეობის სიაში შეიტანა.

ქალაქის ცენტრში მდებარეობს ილხანთა მმართველის, ოლჯაითუს მავზოლეუმი (აგრეთვე ცნობილი როგორც მუჰამედ ხუდაბანდას მავზოლეუმი), რომელსაც უფრო სოლთანიეს გუმბათის სახელით იცნობენ.

სტრუქტურა აშენდა 1302-1312 წლებში. დღეისათვის ის მთელ მსოფლიოში მესამე უდიდეს აგურისგან ნაგებ გუმბათოვან შენობას წარმოადგენს ფლორენციის კათედრალისა და აია-სოფიას შემდეგ. მავზოლეუმის შიდა ინტერიერის მოხატულობის დიდი ნაწილი დაკარგულია, მაგრამ შემორჩენილია მოზაიკები და რამდენიმე ფრესკა. შენობის არქიტექტურა საკმაოდ ჰგავს ტაჯ-მაჰალისას.