Tractat dels Pirineus ( პირენეს ზავი )

პირენეს ზავი (ფრანგ. Traité des Pyrénées, ესპ. Tratado de los Pirineos) — ზავი საფრანგეთსა და ესპანეთს შორის. დაიდო 1659 წელს. ხელი მოაწერეს საფრანგეთის მხრიდან ჯულიო მაზარინიმ, ესპანეთის მხრიდან ესპანეთის პირველმა მინისტრმა ლუის დე არომ. ამ ზავით ესპანეთი საფრანგეთს აძლევდა რიგ ტერიტორიებს ესპანეთის ნიდერლანდში, პირენეს საზღვარზე. პირენეს მთები ხდებოდა საფრანგეთ-ესპანეთის ახალი საზღვარი. დადასტურდა საფრანგეთის უფლებები ნავარაზე. საფრანგეთი ტოვებდა კატალონიის დაკავებულ ნაწილს, ზოგიერთ ციხეს ნიდერლანდში და ფრანშ-კონტეში. პირენეს ზავის მიხედვით საფრანგეთის მეფე ლუი XIV-ს ცოლად უნდა შეერთო ფილიპე II-ის ასული ესპანეთის ინფანტა მარია ტერესა, რომელსაც მზითვად ატანდნენ 500 ათ. ოქროს ეკიუს. ესპანეთის მიერ ამ თანხის დროულად გადახდის შემთხვევაში მარია ტერესა უარს ამბობდა ესპანეთის ტახტზე. ომით გამოფიტულმა ესპანეთმა ვერ შეძლო ფულის დროზე გადახდა, რაც ესპანეთის ჰაბსბურგთა სამფლობელოებსა და ესპანეთის ტახტზე საფრანგეთის პრეტენზიების საბაბად იქცა.