ნისა — ძველი პართიული ქალაქი თურქმენეთში. მდებარეობს აშხაბადიდან 18 კმ-ში. დააარსეს პართიელებმა კოპეტდაღის მთისწინეთში ძვ. წ. III საუკუნეში. მომდევნო ექვსი საუკუნე იგი იყო არშაკიდების დინასტიის მნიშვნელოვანი დასაყრდენი პუნქტი. გარკვეული პერიოდის განმავლობაში იყო პართიის დედაქალაქიც სახელწოდებით „მითრიდატკირტი“ (სახელი ეწოდა მეფე მითრიდატე I-ის პატივისცემის ნიშნად).

სასანიანების ხელისუფლებაში მოსვლის შემდეგ ქალაქის მნიშვნელობა დაეცა. მაგრამ კვლავ აღორძინდა შუა საუკუნეებში, როგორც აბრეშუმის გზის სავაჭრო ცენტრი. მოსახლეობამ საბოლოოდ მიატოვა XIII საუკუნეში, მონღოლთა გამანადგურებელი შემოსევების შედეგად.

2007 წელს ქალაქის ნანგრევები შეიტანეს იუნესკოს მსოფლიო მემკვიდრეობის ძეგლების სიაში.