ქუმბუს მყინვარი — ხეობის ტიპის მყინვარი ჰიმალაიში, ქუმბუს რეგიონში, ჩრდილო-აღმოსავლეთ ნეპალში. სიგრძე 22 კმ. მყინვარის მთავარი სათავე ქვაბულში იწყება, რომელიც ევერესტის სამხრეთ-დასავლეთი კალთებითაა შემოსაზღვრული. ქვაბულის შესართავის რაიონში იგი გადადის 700 მეტრიან ყინულვარდნილში — ეგრეთ წოდებულ ქუმბუს ყინულვარდნილში. ფირნის ხაზი 5700–5900 მ სიმაღლეზეა. ყინულვარდნილის შემდეგ მყინვარი უხვევს სამხრეთ-სამხრეთ-დასავლეთისაკენ და მარჯვნიდან ღებულობს რამდენიმე დიდ შენაკადს. მყინვარის ენის მოძრაობის სიჩქარეა 180 მ წელიწადში. მასზე გვხვდება 20–30 მ სიმაღლის სერაკები. მყინვარის ენა მთავრდება 4600 მ სიმაღლეზე.