Անետո (անգլ.՝ Pico Aneto), ամենաբարձր լեռը Պիրենեյան լեռնաշղթայում, Արագոն համայնքում։ Իսպանիայի երրորդ ամենաբարձր լեռն է, բարձրությունը ծովի մակարդակից 3404 մ է, գտնվում է Իսպանիայի Ուեսկա նահանգում, Ֆրանսիայի սահմանից 4 կմ հարավ։ Տեղաբնիկների կողմից առավել հայտնի է որպես Pic de Néthou (ֆր.), որը և նրա տարբերակները ընդհանուր առմամբ գործածվել են մինչև XX դարի սկիզբը։

Անետոն գտնվում է Պոսետս-Մալադետա ազգային պարկում, Մալադետի զանգվածի մասն է կազմում՝ Բենասկյան մունիցիպալիտետում։ Այն կազմված է Պալեոզոյան և Մեզոզոյան դարաշրջաններին բնորոշ նյութերից։ Նրա հյուսիսային կողմում է գտնվում Պիրենեյների ամենամեծ սառցադաշտը՝ զբաղեցնելով 79,6 հա տարածք (2005 թվականի տվյալներով)։ Դա արագորեն նվազում է ամառային ջերմաստիճանի բարձրացման և ձմեռային տեղումների նվազման հետևանքով։ Այն 1981 թվականին ծածկել է 106,7 հա, իսկ XIX դարում ավելի քան 200 հա տարածք։ Ենթադրվում է, որ այն ամբողջովին կանհետանա 2050 թվականին։