Ribeko Katedrala

Ribe 705-710 urteen inguruan sortua bide da, nahiz eta lehendabiziko aipamena 854. urtekoa den; edonola ere, Danimarkako hiri zaharrena da.

860. urtean, Hamburg-Bremengo artzapezpiku Ansgarrek Europa iparraldea kristautzeko misioan, Danimarkako erregeari eskatu zion Eskandinaviako lehenengo eliza kristaua Riben eraiki behar zela. Izan ere, Ribe baitzen inguru hartan merkataritza mugimendu handiena zuen herria. Hala ere, ez zen katedralik eta apezpikurik han izan 948 arte.

1460an, Riben sinatu zen Ribeko Ituna. Haren bitartez, Kristian I.a Danimarkakoak eta hainbat alemaniar noblek Danimarkako Schleswigeko dukerria eta Alemaniako Holsteingo konderria bateratzea erabaki zuten, eta Danimarkaren menpe geldituko zen, Hego Jutlandia (Sønderjylland) izenarekin.

1580ko irailaren 3an sute itzela gertatu zen: 11 kale eta 213 etxe erre ziren. 1634ko urriaren 11 eta 12an, ekaitz batek sei metroko olatuak eragin zituen, eta herria suntsitu. Ez zen 1976 arte dikerik eraiki, itsasoari aurre egiteko. Hondamendi haiek gorabehera, Ribeko alde zaharreko 100 etxek ondo iraun dute, eta ondare nazional izendatuak daude.

2007an Esbjerg, Ribe eta Bramming udalerriek bat egin zuten, Esbjerg udalerria eratzeko.