Lucy (Australopithecus)

Description

Lucy (AL 288-1) Australopithecus afarensis espeziearen hominido baten hezur multzoa da. Hezur horiek, Donald Johansonek aurkitu zituen 1974ko azaroaren 24an Awash haranean Hadar herritik hurbil, Etiopian.

"Lucy"ren hezurrak 3,2-3,5 milioi urte dituzte eta 20 urteko emakumezko baten hezurduraren % 40 dira. Morfologiari dagokionez, aurkitutako hezurdura zuen banakoa 1,10 metro garai eta 27 kg astun zen. Burezur xumea zeukala ikusi da, txinpantzeenaren antzekoa; gainera, bipedoa zela ondorioztatu da, pelbisa eta belaunaren artikulazioa aztertu ondoren. Ezaugarri horiek hominizazio prozesuaren eredu dira.

"Lucy" izena jarri zitzaion The Beatles-en "Lucy in the Sky with Diamonds" abestiagatik; izan ere, abesti hori langileen kanpamentuan entzun zen aurkikuntzaren lehenengo egunean.